Інтэлектуальным рухам на Маларытчыне Леанід Лук’янчук, настаўнік тэхнічнай працы раённай гімназіі, займаецца ўжо не адзін год. Каманды юных знаўцаў, якія ён трэніруе, 16 разоў займалі першыя прыступкі і станавіліся прызёрамі конкурсаў рознага ўзроўню, у тым ліку - і міжнародных. Нядаўна скарбонка ўзнагарод папоўнілася яшчэ адной.
На чарговым чэмпіянаце Брэсцкай вобласці па інтэлектуальных гульнях сярод ювеналаў (вучні, не старэйшыя за 9-класнікаў) каманда “Фартуна” Маларыцкай раённай гімназіі другі год запар стала чэмпіёнам гульні “Што? Дзе? Калі?”. Бліскучая перамога заваявана ведамі юных знаўцаў дзявятых класаў у складзе Ангеліны Ярмашук (капітан), Дзмітрыя Максімука, Вадзіма Графа, Дар’і Закрутнай, Дар’і Бягезы і вучня 6 класа Андрэя Бурды. Акрамя таго, у фінал чэмпіяната вобласці трапіла яшчэ дзве каманды, якія трэнеруе Леанід Ксенафонтавіч. Гэта - “Ігракезы” з 25 выніковым месцам у турнінай табліцы.
Своеасаблівай сенсацыяй можна лічыць і такі факт. Каманда “Камета”, якая складаецца з вучняў 5-6 класаў (Іван Буглак (капітан), Антон Надзяжук, Кірыл Галоўчык, Вераніка Кручок, Кацярына Макушэнка, Андрэй Наўрасюк і Аляксандра Піпко), апынулася на 26 месцы сярод вучняў дзявятых класаў вобласці.
Каманда “Фартуна” ў пачатку мая будзе абараняць гонар Брэстчыны ў фінале ІХ чэмпіянату Рэспублікі Беларусь сярод ювеналаў “Буслік” у г.Мозыр.
***
У чым выніковасць працы педагога? Напэўна, у тым, што з вучнямі Леанід Лук’янчук усюды і заўжды. Дзецям з ім весела і цікава. Леанід Ксенафонтавіч - чалавек шчыры, адкрыты, камунікабельны і ведае, пра што можна пагаварыць і з першакласнікам, і з выпускніком.
У педагагічным жыцці Леанід Лук’янчук прытрымліваецца слоў Макарэнкі, які калісьці сказаў, што вучні могуць дараваць сваім настаўнікам усё: і строгасць, і сухасць, і нават прыдзірлівасць, але не даруюць дрэннага ведання прадмета. А каб такога не ўзнікла, трэба ўсведамляць сваю грамадскую значнасць, пастаянна рабіць аб’ектыўны самааналіз і сістэматычна працаваць над самаўдасканаленнем. А гэтаму няма межаў. Галоўным Леанід Лук’янчук лічыць: быць прыкладам ва ўсім, выхаваць чалавека і прывіць яму любоў да працы. Педагагічных сакрэтаў, якіх у творчай скарбонцы сабралася многа, ён ні ад каго не ўтойвае. Навучальны працэс Леанід Ксенафонтавіч будуе ў першую чаргу на здароўезберагальных тэхналогіях, уліку індывідуальных псіхалагічных асаблівасцей і павазе да кожнага гімназіста. Да любога школьніка на ўроках і ў пазаўрочную дзейнасць неабходна адносіцца як да роўнага. Для яго любы вучань – асоба, самабытная, непаўторная, творчая і яркая. Толькі трэба падабраць ключык, каб адкрыць бязмерныя магчымасці і талент кожнага, які часта спіць, бо яго не заўважылі і не падтрымалі ў патрэбны момант. А яшчэ, перакананы Леанід Ксенафонтавіч, кожнага вучня трэба проста любіць.
Мікалай Навумчык.
На здымку: Леанід Лук’янчук, трэнер, з камандай “Фартуна”, чэмпіёнам Брэстчыны 2014г. у гульні “Што? Дзе? Калі?”.
Фота аўтара.