Аб гэтым ішла размова падчас правядзення абласнога семінара «Асноўныя спосабы фарміравання арфаграфічнай граматнасці вучняў першай ступені агульнай сярэдняй адукацыі». Яго арганізатарамі выступілі: упраўленне адукацыі Брэсцкага аблвыканкама, Брэсцкі абласны інстытут развіцця адукацыі і аддзел адукацыі, спорту і турызму Маларыцкага райвыканкама. Семінар прайшоў на базе ўстаноў адукацыі райцэнтра. У яго рабоце прынялі ўдзел спецыялісты (метадысты), якія курыруюць арганізацыю адукацыйнага працэсу на першай ступені агульнай сярэдняй адукацыі ў рэгіёнах Брэстчыны.
-Арфаграфічная пісьменнасць - адна з частак агульнай моўнай культуры чалавека, - адзначыў падчас адкрыцця семінара Вадзім Шпетны, намеснік старшыні Маларыцкага райвыканкама. - Працэс фарміравання арфаграфічных навыкаў патрабуе вялікіх намаганняў і настаўніка, і вучня. Павышэнне арфаграфічнай пісьменнасці было і застаецца адным з галоўных пытанняў методыкі мовы. Поспех навучання арфаграфіі залежыць ад многіх фактараў, таму што вывучэнне яе правіл – вельмі складаная, крапатлівая штодзённая праца. І настаўніку трэба так арганізаваць вучэбную дзейнасць на ўроку мовы, каб гэты працэс быў больш хуткім і лёгказасваяльным.
Якія неабходна прымяняць метады, прыёмы, каб вучні змаглі свядомага авалодаць правіламі? З дапамогай якіх эфектыўных сродкаў, тэхналогій настаўніку неабходна забяспечыць паступальны рух у выпрацоўцы трывалых арфаграфічных навыкаў? На гэтыя і іншыя пытанні ўдзельнікі абласнога семінара і атрымалі адказы, наведваючы гарадскія ўстановы адукацыі Маларыты.
У СШ №1 Таццяна Кашэпа, намеснік дырэктара, акцэнтавала ўвагу прысутных на праблеме навучання арфаграфіі і шляхах яе вырашэння, на прычынах арфаграфічных памылак і шляхах іх папярэджання, расказала аб метадах і прыёмах фарміравання арфаграфічнай пільнасці вучняў. Вікторыя Астапук, настаўніца пачатковых класаў, правяла майстар-клас «Развіццё арфаграфічнай пільнасці на ўроках рускай мовы сродкамі слоўнікавай работы».
Сваім багатым вопытам работы падзяліліся і настаўнікі раённай гімназіі. Таццяна Пракошына, намеснік дырэктара, расказала, як выкарыстанне сучасных педагагічных тэхналогій уплывае на павышэнне якасці навучання і выхаванне малодшых школьнікаў. Цікавым быў і праведзены Жаннай Клюнчык, настаўніцай пачатковых класаў, фрагмент ўрока ў 2 класе, а Наталляй Заляшчук, настаўніцай пачатковых класаў, – факультатыўны занятак у 2 класе па тэме семінара. Людміла Сцепанюк, настаўніца пачатковых класаў, прадэманстравала, як творчая дзейнасць малодшых школьнікаў у працэсе стварэння мультфільмаў фарміруе арфаграфічную граматнасць.
Шмат карыстана для сябе ўдзельнікі семінара ўзялі і ў педагогаў СШ №2. Таццяна Яцура, кіраўнік метадычнага аб'яднання настаўнікаў пачатковых класаў, расказала, якую ролю мае метадычнае фарміраванне для павышэння прафесійнага ўзроўню педагога ў пытаннях фарміравання арфаграфічнай граматнасці вучняў. Тамара Тарноўская, настаўніца пачатковых класаў, правяла майстар-клас па тэме «Фарміраванне навыкаў хуткага чытання як адна з умоў граматнага пісьма».
Напрыканцы семінара адбылося выступленне тэатральнага калектыву «Вясёлы перапынак» Маларыцкага цэнтра дадатковай адукацыі дзяцей і моладзі, падрыхтаванае пад кіраўніцтвам Зоі Ляшчынскай. Яно называлася «Урок – пазакласны занятак як спосаб пераемнасці ў фарміраванні арфаграфічнай граматнасці вучняў».
Вынікі работы былі падведзены з удзелам Таццяны Лаўрэенка, начальніка аддзела адукацыі, спорту і турызму Маларыцкага райвыканкама, Таццяны Чанавай, галоўнага спецыяліста упраўлення адукацыі Брэсцкага аблвыканкама, Міраславы Крывушынай, метадыста ДУА «Брэсцкі абласны інстытут развіцця адукацыі».
Мікалай НАВУМЧЫК.
На здымках: у час правядзення абласнога семінара ва ўстановах адукацыі г.Маларыта па пытаннях фарміравання арфаграфічнай граматнасці вучняў пачатковых класаў.