Мерапрыемства, якое было прысвечана Дню абаронцаў Айчыны і Узброенных Сіл Рэспублікі Беларусь, прайшло на базе раённай гімназіі. Спаборніцтва сабрала самых спартыўных, дужых, спрытных, кемлівых юнакоў 9 каманд устаноў адукацыі Маларытчыны.
Каб заваяваць пераходны Кубак спаборніцтваў, трэба было прадэманстраваць добрыя вынікі ў 7 выпрабаваннях: інтэлектуальным конкурсе капітанаў (тэарэтычная падрыхтоўка на ваенную тэматыку), падцягванні на перакладзіне, падыманні гіры (16 кг), стральбе з пнеўматычнай вінтоўкі, перацягванні каната, скачках удаўжыню з месца і ДАРТСе.
Турнір атрымаўся эмацыянальным і энергічным. Балельшчыкі сваёй прысутнасцю дапамагалі ўдзельнікам паказаць высокія вынікі. Барацьба з самага пачатку за перамогу была ўпартай і напружанай. Ацэньваліся як асабістыя дасягненні, так і камандныя выступленні. У выніковай турнірнай табліцы, як і ў мінулым годзе, першае месца заваявала каманда юнакоў раённай гімназіі ў складзе Андрэя Вярэніча, Дзмітрыя Бурштына, Віталія Дзедзюка, Дзмітрыя Яромкіна, Даніілы Кацярыніча, Івана Смаля, Дзмітрыя Серады, Кірылы Саўчука, Паўла Русавука і Уладзіслава Арлоўскага. На другое месца з адрывам у адзін бал узнялася каманда юнакоў Збуражскага д/с-СШ, на трэцяе – “рыцары” Лукаўскай СШ.
У асабістым заліку юнакі таксама паказалі добрыя вынікі. Яны прадэманстравалі сілу духу і імкненне да перамогі. Аднак перамаглі самыя падрыхтаваныя. У конкурсе капітанаў лепшым стаў Валерый Кавалевіч (Збуражскі д/с-СШ), у стральбе з пнеўматычнай вінтоўкі – Раман Кардзялюк (Лукаўская СШ), у падыманні гіры – Павел Русавук (раённая гімназія), у падцягванні на перакладзіне – Валянцін Кульчынскі (Гвозніцкі д/с-СШ), у ДАРТСе – Максім Супрунюк (Збуражскі д/с-СШ), у скачках з месца – Андрэй Вярэніч (раённая гімназія).
Каманды, якія занялі 1-3 месцы, пераможцы ў асобных конкурсах у асабістым заліку ўзнагароджаны дыпломамі і падарункамі.
* * *
У фае раённай гімназіі можна было пазнаёміцца з узбраеннем і спецыяльнымі сродкамі Узброенных Сіл Рэспублікі Беларусь, а таксама паглядзець паказальнае выступленне кінолага і сабакі АПС “Маларыта”.
На працягу многіх гадоў “Рыцарскі турнір” застаецца цікавым спартыўным святам, якое збірае шмат удзельнікаў і балельшчыкаў. Спаборніцтва, накіраванае на прапаганду здаровага ладу жыцця, далучэнне моладзі да актыўных заняткаў фізічнай культурай і спортам, развіццё маральных і фізічных якасцей, падрыхтоўку юнакоў для праходжання службы ва Узброеных Сілах і выхаванне патрыятызму, у чарговы раз паказала, што юнакі Маларытчыны сябруюць са спортам.
Мікалай НАВУМЧЫК.
На здымках: моманты спаборніцтва; каманда-пераможца турніру з раённай гімназіі.
Фота аўтара.